III CARREIRA QUILÓMETROS DE SOLIDARIEDADE ORGANIZADA POLOS DEPARTAMENTOS DE RELIXIÓN E EDUCACIÓN FÍSICA

Un ano máis e, vencendo as inclemencias do tempo, os rapaces e rapazas de secundaria do CPI Conde de Fenosa correron a III Carreira Quilómetros de Solidaridade baixo o lema: Xuntos por un obxectivo común, que todos os nenos e nenas teñan as mesmas oportunidades. A recadación que ascendeu a 314,50 € foi a parar esta vez a un proxecto educativo en Etiopía. 

Grazas a todos os rapaces e rapazas pola súa entrega e solidariedade, ás familias, aos profesores, ás empresas e comercios do Concello (DIA, Froiz, Floristería Real, Ramil Ganma, Clinica Veterinaria San Antonio), ao Concello de Ares (policía local, protección civil), aos alumnos do PCPI por axudar na organización de toda a carreira e por suposto a nosa atleta Paula Mayobre que un ano máis nos acompañou no evento.

                              

ÉXITO DA OPERACION QUILO DE NADAL

Hoxe os máis de 500 quilos de alimentos que recollimos no noso cole, foron entregados as institucións "Cociña Económica de Ferrol" e "Cáritas de Ares". Grazas de novo ás familias, ao alumnado e ao profesorado pola vosa solidariedade e colaboración nesta campañada Operación Quilo de Nadal.

                              

10 DE DECEMBRO "DÍA DOS DEREITOS HUMANOS"

Con esta foto tomada no corazón de Soweto (Sudáfrica) vos desexamos un feliz Día dos Dereitos Humanos e, ao mesmo tempo, dedicamos o noso adeus ao maestro MANDELA.

OS NENOS E NENAS DE INFANTIL "B" CON MAHÁN NO DÍA DOS DEREITOS HUMANOS

Hoxe  celébrase o Día dos Dereitos Humanos e que mellor data para que os pequerrechos de infantil B coñezan a historia do noso amigo Mahán que, como todos sabedes, non ten dereito á unha educación coma nós.

Esperamos que lles gustara o conto, así como a pegatina e a cadeira vermella que levaron de recordo para as súas aulas e que lembra a todos eses nenos e nenas que aínda non teñen dereito á educación.

TRADICIÓNS

Queridos alumn@s de 1º da ESO,  debedes de  buscar información sobre estas tradicións relixiosas no mundo:

- O Nadal.
- O Ramadán.
- O Hanuka ou festa das luces.
- O Yom Kippur.

Ademais de achegar a información, debedes de buscar algunha imaxe que ilustre cada unha delas.

Como complemento a esta actividade, podedes investigar tradicións relixiosas que vos chamen a atención e dicir o por que. Ademais debedes de  describir unha ou dúas que estean presentes na vosa familia ou que se celebren na vosa vila.

O traballo o podedes entregar na clase ou envialo a o correo seguinte: enreliando@gmail.com

VISITAMOS A ONG CÁRITAS EN ARES

Neste primeiro trimestre estivemos a traballar o papel que desempeñan as ONG´s na sociedade  e no mundo. Para completar o noso traballo, hoxe  os  alumnos e alumnas de 1º  ESO visitamos as instalacións de Cáritas sitas no baixo dá Biblioteca de Ares, lugar que cedeu amablemente o Concello para que esta institución poida atender as persoas que o necesitan.

Cando chegamos estábannos a esperar Concha e  Lorena  que son dúas das voluntarias que traballan desinteresadamente en Cáritas de Ares. Amablemente explicáronos como funciona esta institución: como xurdíu Cáritas, canto tempo levaba en funcionamento, cantos alimentos recollían ao mes, o perfil dos usuarios e unha morea de preguntas máis que os rapaces e rapazas  lles fixeron. Tamén amosáronnos as instalacións: o ropeiro con toda a roupa doada pola xente, os conxeladores onde gardan alimentos perecedeiros, a sala onde están- en diversas estanterías- os alimentos recollidos. Explicáronnos que ademais dos alimentos que recollen na sé de Cáritas, tamén contan coa colaboración de diversos supermercados e establecementos de Ares onde a xente pode depositar a súa doazón. 

“Aínda que estamos en tempos de crise, e todos a notamos, a xente de Ares é moi solidaria”, suliñou Concha, quen nos puxo o exemplo de  xente que nun determinado momento tivo que acodir a Cáritas e  hoxe en día, esa mesma xente, que se encontra nunha mellor posición, achégase pola institución para deixar alimentos e aportar o que pode dentro dás súas posibilidades.

 A verdade é que os alumnos/as quedaron impresionados e mostraron moito interese. Na nosa visita tamén aportamos un pequeno graíño de area levando uns cantos alimentos e unhas caixas de leite.

Grazas a Concha e a Lorena por recibirnos sempre tan ben e dicir que esta visita é previa á que faremos no nadal cando levemos a Cáritas e á Cociña Económica de Ferrol, os alimentos que recolleremos no noso centro dentro da “Operación Quilo” de Nadal.

"MAHÁN E A CADEIRA VERMELLA". UN CONTO POLO DEREITO Á EDUCACIÓN UNIVERSAL.

"A cadeira vermella" é a campaña que Entreculturas lanza para concienciar á poboación do dereito á educación de máis de 61 millóns de nenos en todo o mundo que están sen escolarizar. Un grupiño de alumos/as de 3º da ESO axudaron a presentar esta campaña reivindicando a escolarización universal para todos os nenos e nenas do mundo. 

Un mural (feito por Ana Martínez de 2º ESO), unha frase ben sinxela: “Polo dereito á educación de todos os nenos e nenas do mundo” e unha simple cadeira vermella recórdanos a importancia da educación e de que ese dereito se faga realidade para os 61 millóns de nenos e nenas que, a día de hoxe, están sen escolarizar en diferentes lugares do mundo e non teñen a sorte e o privilexio de asistir a unha escola e aprender.

Hoxe para celebrar o Día dos Dereitos da Infancia realizamos unha sesión de contacontos para o alumnado de 1º de Primaria. Os alumnos/as encargados de toda esta montaxe foron un grupiño de rapazas e rapaces de 3º da ESO do noso cole. 

O conto cuxo título é “Mahán e a cadeira vermella” está inspirado na campaña "A cadeira vermella”" lanzada pola ONG Entreculturas e foi creado polos nenos e nenas de 1º da Eso do CPI “Virxe da Cela” de Monfero. As nosas compañeiras de 3º Andrea, Begoña, Lucía e Ainhoa foron as encargadas de contar a historia de Mahán  aos nosos pequerrechos de 1º EP, así como facer unha pequena dinámica e un xogo para facelos recapacitar sobre á importancia da educación. 

As profes dos pequerrechos tamén demostraron as súas dotes interpretativas na dinámica que levamos a cabo.

Pero a sesión non rematou aquí. As nosas compañeiras Raquel e Eva crearon un conto titulado “A historia de Niara”. Esta historia ten a peculiaridade de que está sen rematar,  así que as profes levaron unha copia para que entre todos os nenos e nenas, escriban como lles gustaría que  rematase a historia de Niara. 

Por último, os pequerrechos levaron de agasallo unha pegatina feita por  Paola Toribio de 2º da ESO, que ilustra moi ben esta campaña, así como unha pequena cadeira vermella como símbolo dos 61 millóns de nenos e nenas que non poden ir á escola.

Parabéns a todos os alumnos/as que preparáchedes a sesión por demostrar esas capacidades creativas e deixar voar a vosa imaxinación, e aos pequerrechos de primaria por ser tan participativos e estar tan atentos.

Dicir que nas vindeiras semanas seguiremos coas sesións de contacontos  para que todos os cursos de infantil e primaria poidan gozar da historia de “Mahán e a cadeira vermella”.

                        

                        Mahán e a cadeira vermella from Yolanda Castro López

Mahan e a cadeira vermella - presentacion imagenes

DE QUEN SE TRATA?

Voltamos de novo co noso concurso "De quen se trata?".  Esta vez tedes que adiviñar o  nome dunha persoa comprometida cos dereitos humanos e que no seo da igrexa defendeu a "opción preferencial polos pobres".

Pistas:

• Loitou sobre todo polos dereitos dos campesiños, dos obreiros e de todas as persoas que recurrían a el no contexto da violencia e a represión militar que vivía o seu país.
• Unha das súas frases que resume o seu pensamento é: “A verdade fainos libres e a mentira convértenos en escravos”. 
• Morreu asasinado.

 Se descubrides quen é, debedes mandar ao correo do blogue: enreliando@gmail.com, o nome do personaxe así como unha pequena síntese da súa biografía na que apareza tamén unha imaxe del.

O alumno/a que antes envíe o correo coa resposta correctamente redactada e elaborada, recibirá un agasallo. Haberá un pequeno obsequio para todos os participantes que aínda que non chegaran de primeiros, deran co noso personaxe misterioso.

20 DE NOVEMBRO, DÍA DOS DEREITOS DA INFANCIA

A tres semanas da celebración da importante data  do "Día dos dereitos da infancia", penduramos no blogue os seguintes materiais didácticos aportados pola ONG Entreculturas. Os profes e titores podemos ir así familiarizándonos con conceptos e ideas, que nos poden levar á realización de actividades para esta conmemoración tan destacada. Coñeceremos as iniciativas que se están levando a cabo tanto en España como no Chad, e esperamos as vosas ideas para lanzar desde o CPI Conde de Fenosa.

PROXECTO ONG´S

O alumnado da ESO do noso centro estivo a traballar sobre o papel que xogan as ONG´s no desenvolvemento humano dos pobos. A partir da información que foron recompilando elaboraron este dosier no que se incluen algunhas das ONGD máis importantes e as actuaciones que están a realizar, encamiñadas ao desenvolvemento de colectivos excluidos ou en risco de exclusión, así como a países ou comunidades necesitados de axuda e ao  desenvolvemento humano e sostible do noso planeta.

Aquí vos deixamos o dosier. Picade enriba del para velo en grande.

CONCURSO: DE QUEN SE TRATA?

PISTAS:

1.- O seu autor naceu a principios do século XX en Buenos Aires.

2.- Este cadro pintouno  en 1975

3.- Morreu na Coruña en 1979 

PREMIO: 

O alumno/a que antes envíe, a través dun comentario ao noso enderezo electrónico,unha pequena reseña na que apareza:

• Nome do autor e unha pequena síntesis da súa biográfica.
• Nome da obra e unha pequena descrición da mesma.

     O Departamento de Reli obsequiarano cun agasallo.

BENVID@S A UN NOVO CURSO

Comeza o novo Curso Escolar 2013-2014. Desde Enreliando  dámosvos a benvida a todos e todas.

Seguramente moitos viredes con novas ideas e propósitos para esta nova andaina. Tamén con novas forzas despois do verán. Esperamos que o comezo sexa bo para tod@s e que todas esas novas ideas e propósitos teñan cabida ao longo do curso.

 Por iso, a todos, pais e nais, profesores e profesoras e, en especial, a todo o noso alumnado, FELIZ CURSO!!!.

OS RÍOS COMO LUGARES SAGRADOS E DE CULTO

Os ríos como lugares sagrados e de culto from Yolanda Castro López

SOMOS: UNIDOS PARA CAMBIAR O MUNDO

A unión fai a forza, e de momento, xa SOMOS máis de tres millóns de persoas dispostas a cambiar o mundo. Así nace SOMOS, unha iniciativa que agrupa a numerosas ONGs coa finalidade de fomentar a solidariedade na sociedade na que vivimos, e para recoñecer todo o que os colaboradores das ONGs fan día a día. 

O noso cole leva mostrando o seu compromiso coa solidariedade en diferentes proxectos, e neste día, venres 24 de xuño, queremos mostrar a todo o mundo que podemos dar a volta ás cousas. Deixamos a nosa testemuña a través dos retratos dos rapaces e rapazas e dos profes, que decidiron exhibir unha prenda de vestir ao revés, sumándose a este soño de cambiar o mundo e de dar volta ás cousas.

                      

GAÑADORES AUTONÓMICAS DO CONCURSO ONCE

Por segundo ano consecutivo e desde a clase de reli, un grupo de alumn@s presentaronse ao Concurso Escolar Once e, por segundo ano consecutivo, quedaron gañadores do  mesmo. Este ano baixo o lema "A cápsula do tempo: a aventura de construir o futuro" os nosos alumn@s imaxinaron como sería a sociedade do mañá en relación á dispacidade e a igualdade de oportunidades. O equipo gañador foi "As cambiaconciencias", formado por Judith Rouco, Laura Pita e Sara Martínez, alumnas de 3º da ESO. Tamén participaron no concurso o grupo "Aresáns solidarios" formado por Felipe Crespo, Antonio Lemos, Ainhoa Somorrostro e Lucía Buyo, que ainda que non gañaron fixeron un estupendo traballo. En hora boa a todos e cada un deles.

Aqui vos deixamos o vídeo gañador.

                            

AS GRANDES PERSOAS FAN GRANDE A NOSA HISTORIA

 Ó longo da historia moitos personaxes aportaron "o seu gran de area" na construción dun mundo mellor. No collage están algúns deles.(Martin Luther King, Mozart, Gandhi, Madre Teresa, Séneca...)

Como ves, a imaxe central fai referencia ao traballo que queremos que fagas con esta entrada: que nos suxiras, a través dun comentario, algún outro personaxe que debería formar parte deste collage. Pedímosche, ademais, que comentes brevemente algún detalle da súa vida que o fai merecedor de ser imitado.

FELIZ PASCUA DE RESURRECCIÓN

 Domingo de Pascua en Lubre (Ares). Bendición de los bollos

                        

XA TEMOS NOVO PAPA: FRANCISCO I

O cardeal Jorge Mario Bergoglio, de 76 anos, ocupará a cadeira de Pedro co nome de Francisco. É o primeiro latinoamericano e o primeiro membro da Compañía de Jesús que dirixe a Igrexa. Tras cinco votaciones, os 115 cardeais inclinaron a votación a favor do arzobispo de Bos Aires.

A AVENTURA DE CONSTRUÍR O FUTURO

"A Cápsula do Tempo: A Aventura de Construír o Futuro" é o lema da 29 edición do Concurso ONCE, que nos convida a coñecer todo o que a sociedade española avanzou nos últimos 75 anos, e todo o que aínda podemos mellorar xuntos. O alumnado de 3º da ESO do noso centro aceptou o reto, e aquí tedes algunhas das súas propostas para mellorar o futuro de todos/as aqueles/as que aínda están a atopar demasiadas barreiras, moitas delas psicolóxicas, xa que a discapacidade moitas veces está na mirada do outro.

ADEUS A BENEDICTO XVI

Benedicto XVI deixará de ser Papa o próximo 28 deste mesmo mes, por "falta de forzas". O anuncio realizouno  en persoa o propio Pontífice, en latín, durante un consistorio no Vaticano para a canonización duns mártires. O pontífice foi elixido o 19 de abril de 2005. Segundo o 'Osservatore Romano', esta decisión foi tomada "fai moitos meses" e decidiuno trala longa viaxe que en marzo de 2012 levouno a México e Cuba.

Joseph Ratzinger, de 85 anos, ten toda unha retahíla de achaques. Desde fai tempo camiña con bastón e utiliza unha plataforma con rodas empuxada por empregados do Vaticano para desprazarse pola Basílica de San Pedro. Nos últimos meses, sempre por motivos de saúde, diminuíu os seus compromisos públicos, as súas viaxes e as audiencias.

"Cando un Papa alcanza a clara conciencia de que xa non é física, mental e espiritualmente capaz de levar a cabo o seu encargo, entón ten nalgunhas circunstancias o dereito, e ata o deber, de dimitir”. E ese día xa chegou.

Respecto de que Pontífices renunciaron anteriormente ao ministerio papal, menciónase só a un: Celestino V (no ano 1294), coñecido como o 'Papa do gran rexeitamento'. Con todo, para moitos historiadores tamén habería que contar coa marcha de Gregorio XII, en 1415.

Joseph Ratzinger trasladarase á residencia de Castel Gandolfo cando comece o proceso de Sé Vacante (o tempo que transcorre desde que un Papa falece ou renuncia ata que se elixe sucesor) e unha vez que haxa novo Sumo Pontífice retirarase a un mosteiro de clausura dentro do Vaticano.

Todo apunta a que o cónclave para elixir sucesor celebrarase en marzo. Nel, participarán 120 cardeais do Colexio Cardenalicio vaticano, que debaterán na Capela Sixtina (illados, sen poder poñerse en contacto co exterior) ata que haxa 'fumata branca'.